Um 110 jarðskjálftar hafa mælst á umbrotasvæðinu við norðvestanverðan Vatnajökul frá miðnætti. Stærsti skjálftinn í kvöld mældist kl. 18:49 en hann var 3,5 að stærð. Rúmlega 60 skjálftar hafa mælst við öskju Bárðarbungu og 50 í kvikuganginum, samkvæmt upplýsingum frá Veðurstofu Íslands.
Stærstu skjálftarnir urðu fyrri part dags, en sá stærsti varð á fimmta tímanum í nótt. Hann mældist 5,2.
Eldgosið í Holuhrauni heldur áfram af svipuðum krafti og undanfarna daga og ekkert dregur úr rennsli hrauns. Þá er ekkert lát á sigi öskju Bárðarbungu.
Á morgun er útlit fyrir vaxandi sunnan og suðaustan átt og má búast við að gasmengun berist til norðurs og norðvesturs frá eldstöðinni.
Nánari upplýsingar er að finna á vef Veðurstofu Íslands og vef Almannavarna.