Vangaveltur þess efnis að flugmaðurinn sem grandaði vél Germanwings í frönsku Ölpunum  hafi þjáðst af þunglyndi og sjálfsmorðshugleiðingum hafa tvímælalaust áhrif á umræðuna um geðsjúkdóma og byggja jafnvel á fordómum, ef marka má formann Geðhjálpar.

Hrannar Jónsson segir áhyggjuefni að orðið „þunglyndi“ sé dregið fram til skýringar á hinu og þessu.

„Það eru nánast engar líkur á því að einhver sem þjáist af vægu eða meðalþunglyndi eða kvíða sé í sjálfsvígshugleiðingum eða það renni á hann eitthvert morðæði, að öðru óbreyttu. Þetta hefur verið töluvert mikið rannsakað,“ segir Hrannar.

Hann segir hins vegar vitað að ákveðin þunglyndislyf geti valdið því að það leiti á fólk hugsanir um að skaða sig eða aðra. Þörf sé á frekari rannsóknum á aukaverkunum geðlyfja og þeim áhrifum sem það getur haft á fólk að hefja og hætta inntöku þeirra.

Hrannar segir fordómafullt að gefa út yfirlýsingar um veikindi flugmannsins áður en frekari upplýsingar liggja fyrir. „Það eru alls konar atvik í lífi fólks sem geta ýtt undir skaðlega hegðun gagnvart því sjálfu og öðrum, og það eru miklu líklegri áhættuþættir en þunglyndi eða eitthvað slíkt,“ segir hann.

Tengdar fréttir

Flugslys í frönsku Ölpunum

Ár liðið frá ódæðinu

• Vilja skýrari reglur um heilsu flugmanna
• Fylgist heldur með heilsu flugmanna
• Sökuðu rangan Lubitz um morðin
• Krefjast hærri skaðabóta

» Fleiri tengdar fréttir

• Blogga um frétt