Hvað kostaði Menningarnótt?

Í ár nam heildarframlag Reykjavíkurborgar til Menninganætur um 26,7 milljónum króna. Sú upphæð kann að teljast lág í samanburði við umfang hátíðarinnar en heildarumfangið hefur aldrei verið kannað í hennar sögu, að sögn Svanhildar Konráðsdóttur, sviðsstjóra Menningar- og ferðamálasviðs Reykjavíkurborgar. „Menningarnótt er þátttökuhátíð og gríðarlega margir aðilar koma að hátíðinni með einum eða öðrum hætti. Útgjöld Reykjavíkurborgar til hátíðarinnar gefa því mjög takmarkaða mynd og það er mikilvægt að kanna heildarumfang hátíðarinnar,“ segir Svanhildur.

Fyrir utan Reykjavíkurborg koma ótal aðilar að hátíðinni, bæði stórir og smáir, allt frá Landsbankanum og Vodafone niður í minnstu kaffihús og bókabúðir. Það er því mikið verk að kanna heildarkostnað hátíðarinnar en það er áhugavert að varpa ljósi á stærstu kostnaðarþættina hjá Reykjavíkurborg og stóru styrktaraðilunum, sem hér verður reynt að gera.

Stærstu kostnaðarliðir borgarinnar lágu hjá Umhverfis- og skipulagssviði, sem þau meta á um 9 milljónir króna og hjá Menningar- og ferðamálasviði, sem voru tæplega 17,7 milljónir króna. Undir Menningar- og ferðamálasviði er Höfuðborgarstofa sem er aðalskipuleggjandi Menningarnætur og námu heildarútgjöld hennar tæplega 16,7 milljónum króna. „Hlutverk Höfuðborgarstofu er fyrst og fremst að halda utan um það sem gagnast öllum, kynningarmálin og öryggismálin og þess háttar. Stuðningur Höfuðborgarstofu fólst einnig í styrkjum til listamanna og aðila sem halda úti viðburðunum, eins og hjálp með leigukostnað á hljóðkerfum og slíku,“ segir Svanhildur.

Stuðningur til atburða frá Höfuðborgarstofu nam um 9,8 milljónum króna þegar styrkur frá Landsbankanum er dreginn frá. Afgangur kostnaðar Höfuðborgarstofu var launakostnaður vegna undirbúnings hátíðarinnar og vegna ýmissa öryggismála sem lögreglan sá ekki um. Launakostnaðurinn nam um 6,8 milljónum eða u.þ.b. 40% af heildarframlagi sviðsins til hátíðarinnar.

Umhverfis- og skipulagssvið hafa séð um þá þætti Menningarnætur sem liggja í nafni stofnunarinnar en þau sjá t.d.um lokun gatna, hreinsun og þrif. Um 70 manns eru við vinnu yfir helgina og því er kostnaður stofnunarinnar fyrst og fremst launakostnaður.

Fleiri opinberir aðilar komu þó að hátíðinni en Reykjavíkurborg ein. Strætó bauð upp á ókeypis ferðir niður í miðbæ og lögreglan var að vanda með mikinn útbúnað. Upplýsingar um kostnað þeirra liggja þó ekki enn fyrir. Ríkisútvarpið, eða Rás 2 öllu heldur, sá einnig um tónleikana á Arnarhóli.

Margir stórir styrktaraðilar

Ótal atriði voru á boðstólum fyrir sækjendur hátíðarinnar og þrátt fyrir að Höfuðborgarstofa hafi lagt beint fram 9,8 milljónir til ýmissa atburða náði stuðningurinn aðeins til lítils hluta af öllum atburðunum. „Viðburðirnir eru samtals á fimmta hundrað og beinir styrkir Reykjavíkurborgar ná til minna en hundrað aðila,“ segir Svanhildur.

Aðalstyrktaraðilar hátíðarinnar í ár voru Landsbankinn og Vodafone. Styrkur Landsbankans fólst í því að bankinn lagði 3 milljónir króna í Menningarnæturpott Landsbankans eins og undanfarin ár. Höfuðborgarstofa sá svo um að úthluta úr pottinum til fjölda viðburða, frá 50.000 krónum upp í 200.000 krónur á atriði.

Eins og síðustu ár sá Vodafone um flugeldasýninguna sem í ár bar heitið Stjörnubrim. Hún var sett upp af danshöfundinum Sigríði Soffíu Níelsdóttur þriðja árið í röð og vakti mikla lukku. Aðspurðir vildu Vodafone-menn ekki tjá sig nákvæmlega um kostnað vegna flugeldasýningarinnar en samkvæmt heimildum Morgunblaðsins nam hann rúmlega 3 milljónum króna. Framlagið fer ekki um Höfuðborgarstofu heldur beint til Hjálparsveitaar skáta í Reykjavík sem sér um sýninguna.

Hluti af framlagi Höfuðborgarstofu fór til tónleika Bylgjunnar í Hljómskálagarðinum og til tónleika Rásar 2 á Arnarhóli en þó var ekki um verulegt hátt framlag að ræða heldur stóðu útvarpsstöðvarnar sjálfar undir kostnaðinum að mestu. Tónleikar Bylgjunnar kostuðu um 2 milljónir króna og tónleikar Rásar 2 kostuðu um 7 milljónir króna, samkvæmt tölum frá fyrirtækjunum tveimur.