Fýll sóttur og verkaður fyrir veturinn

„Annað hvort finnst fólki fýllinn góður – eða vondur. Það er ekkert þar á milli. Mér finnst hann mjög góður enda vanist honum frá unga aldri. Það var alltaf soðinn fýll í matinn í Pétursey á föstudögum.“

Þetta segir Sigurður Elías Guðmundsson, hótelstjóri í Vík. Hann er einn þeirra sem viðhalda gömlum hefðum Mýrdælinga. Tekur fýlsunga, verkar og matreiðir fyrir fjölskylduna og gesti.

„Við erum búin að taka allt okkar. Fýllinn er ansi vænn núna, hefur fengið gott að éta í sumar,“ segir Elías í samtali um fýlsverkunina í Morgunblaðinu í dag. Flugið hófst um 25. ágúst, heldur seinna en í fyrra. Margir eru byrjaðir á fýlaveiðunum og þeir sem eiga eftir að fara gera það um helgina.