Létu vatnið renna niður kirkjutröppurnar

Listgjörningurinn Dynjandi eftir Örn Inga Gíslason fór fram við kirkjutröppurnar á Akureyri í kvöld. Í gjörningnum var vatn látið renna niður tröppurnar sem lýstar voru upp með lituðum ljósum. Svavar Alfreð Jónsson, sóknarprestur í Akureyrarkirkju, tók þátt í gjörningnum og gekk niður tröppurnar á undan fossinum.

Að sögn fréttaritara mbl.is sem myndaði gjörninginn voru margir samankomnir við tröppurnar til að fylgjast með og var fólk hrifið.

Gjörningurinn var hluti af A! Gjörningahátíðinni sem haldin er í fyrsta skiptið um helgina. Að hátíðinni standa Listasafnið á Akureyri, Leiklistarhátíðin LÓKAL, Reykjavík Dance Festival, Menningarfélag Akureyrar og Kynningarmiðstöð íslenskrar myndlistar með stuðningi frá Myndlistarsjóði.