Bókmenntamerking til heiðurs rithöfundarins Svövu Jakobsdóttur var afhjúpuð á Austurvelli í dag. Sonardætur Svövu, Svava og Ásta-María Jakobsdætur, afhjúpuðu merkinguna.
Bókmenntamerkingin stendur á horni Kirkjustrætis og Pósthússtrætis. Samkvæmt tilkynningu frá Reykjavíkurborg er Svava í brennidepli á Lestrarhátíð í Bókmenntaborg í ár, en hún hefði orðið 85 ára nú í október. Við athöfnina fyrr í dag ávarpaði Úlfhildur Dagsdóttir bókmenntafræðingur gesti.
Reykjavík Bókmenntaborg UNESCO hóf að kortleggja og merkja skáldaslóðir í borginni með bókmenntamerkingum á öðru starfsári sínu og var fyrsta merkingin afhjúpuð á Lestrarhátíð í október 2012. Hún er í Aðalstræti þar sem Langibar (Adlon) stóð og er tileinkuð Elíasi Mar. Bókmenntamerkingarnar eru hluti af menningarmerkingum Reykjavíkurborgar þar sem vakin er athygli á sögu og menningu borgarinnar í borgarlandinu.