Seinkanir á flugi Icelandair vegna verkfallsaðgerða flugumferðastjóra í nótt höfðu áhrif á 3000-3500 farþega flugfélagsins. Þetta segir Guðjón Arngrímsson, upplýsingafulltrúi Icelandair í samtali við mbl.is.
Í gær þurfi ein vél félagsins frá London að lenda á Reykjavíkurflugvelli klukkan ellefu og fóru farþegar þaðan frá borði. Síðan var öllu Ameríkuflugi félagsins til landsins í morgun seinkað og eru vélarnar nýlentar, en verkfallsaðgerðum lauk klukkan sjö í morgun.
Guðjón segir að flestar vélarnar fari svo áfram til Evrópu núna á milli 8 og 8:30. „Ef allt gengur upp ætti flug að vera með eðlilegum hætti síðdegis,“ segir hann, en þá koma vélarnar frá Evrópu til baka áður en þær halda á ný vestur um haf.
Aðspurður um hvort forsvarsmenn Icelandair hafi heyrt af frekari aðgerðum flugumferðastjóra segir Guðjón svo ekki vera.
Frétt mbl.is: Áhrifin ná til þúsunda farþega