Slökkviliðið á höfuðborgarsvæðinu var kallað út rétt fyrir klukkan fimm síðdegis í dag þegar tilkynning barst um eld í iðnaðarhúsnæði í Dugguvogi í Reykjavík.
Búið var að slökkva eldinn, sem var minniháttar, þegar slökkviliðið kom á vettvang, samkvæmt upplýsingum mbl.is. Reykræsti slökkviliðið húsnæðið, en þar er meðal annars bílaverkstæði til húsa. Engar skemmdir urðu vegna eldsins.
Einn starfsmaður verkstæðisins brenndist við slökkvistörf og var hann fluttur á slysadeild.
Nánari upplýsingar liggja ekki fyrir að svo stöddu.