Lögreglan á höfuðborgarsvæðinu fæst við hin fjölbreyttustu mál í daglegu starfi sínu og ekki eru þau öll tengd lögbrotum. Þannig barst lögreglu um hálfeittleytið í dag beiðni um aðstoð vegna gæsahóps sem var staddur á gatnamótum Ármúla og Vegmúla.
Sá sem hafði samband við lögreglu taldi gæsahópinn geta farið sér að voða, auk þess sem vera hans á gatnamótunum gæti skapað slysahættu í umferðinni.
Er á staðinn var komið reyndist hins vegar ekki tilefni til aðgerða af hálfu lögreglu, enda voru gæsirnar hinar rólegustu.