„Það eru eflaust einhver ferðaþjónustufyrirtæki búin að gera svona kort fyrir sína starfsmenn, en ég tel að hlutir sem varða almannaöryggi og almannaheill eigi ekki að vera einhver leynigögn,“ segir Árni Tryggvason leiðsögumaður sem birti í dag 28 staði í grennd við höfuðborgarsvæðið þar sem aðstæður eru góðar til að stoppa með hópa og skoða norðurljósin.
Sterk norðurljós hafa glatt Íslendinga og erlenda ferðamenn á undanförnum dögum. Sannkallað norðurljósaæði hefur hreinlega gripið um sig og í kvöld verður slökkt á götulýsingu á völdum stöðum í Reykjavík svo íbúar og gestir geti notið sýningarinnar sem spáð er á himni þegar aldimmt verður orðið í kvöld og í nótt.
Kort Árna kemur því á góðum tíma og rímar ágætlega við tilkynningu lögreglunnar á Suðurlandi sem brýndi fyrir skemmstu fyrir norðurljósaáhugamönnum að stöðva ekki bifreiðar sínar á vegum eða vegöxlum heldur finna sér hentugri staði sem sé víðs vegar að finna.
Frétt mbl.is: Slökkt á götuljósum vegna norðurljósa
„Ég er búinn að starfa í tvö ár sem leiðsögumaður meðfram störfum sem ljósmyndari og hönnuður,“ segir Árni. „Ég sé hvernig það hefur fjölgað í norðurljósaferðum og nokkrum sinnum hefur litlu munað að ég hafi straujað yfir kærulausa norðurljósaskoðendur, m.a. á Nesjavallavegi í fyrrakvöld.“
Árni vonast til þess að kortið verði til þess að benda leiðsögumönnum á örugga staði þar sem minni líkur eru á að fólk ani út á götu. „Því miður hef ég séð aðila frá ferðaþjónustufyrirtækjunum sem haga sér eins og fávitar,“ segir Árni. „Þegar ég er að keyra með mína farþega og þeir sjá ljós og vilja stoppa, þá segi ég að ég stoppi ekki fyrr en við séum komin á öruggan stað. Ég negli ekki beint út í kant. Það er bara ávísun á slys.“