Hlupu fyrir bifreiðir í Keflavík

Hópur ungra drengja var í gærkvöld staðinn að þeim háskalega leik að hlaupa fyrir bifreiðir á Hafnargötu í Keflavík. Lögreglumenn á Suðurnesjum ræddu við drengina, sem viðurkenndu að hafa verið að stökkva út á götuna.

Þetta kemur fram í tilkynningu frá lögreglunni á Suðurnesjum.

Kváðust þeir hafa séð myndband á Youtube af slíku athæfi og vildu þeir prófa að leika það eftir. Þeim var bent á að svona háttarlag væri stórhættulegt og lofuðu drengirnir að hætta þessu strax. Haft var samband við forráðamenn þeirra, auk þess sem tilkynning var send á barnaverndarnefnd.

• Blogga um frétt