Þingmenn skorti vilja til að bæta stöðu lögreglu

„Mannekla, búnaðarskortur, fjárskortur og áralangt skilningsleysi gagnvart störfum lögreglu er ekki til komið vegna vankunnáttu stjórnmálamanna, heldur vegna viljaleysis þeirra til að bæta stöðu lögreglunnar,“ segir í harðorðri yfirlýsingu frá Lögreglufélag Austurlands, sem furðar sig á almennum vilja stjórnmálamanna til að veikja lögregluna á Íslandi.

Félagið skorar á frambjóðendur allra flokka við komandi alþingiskosningar að láta sig löggæslumál varða og hefja nú þegar vinnu við að endurreisa lögregluna á Íslandi. Félagið furðar sig á því sem það segir virðast vera almennan vilja stjórnmálamanna til að veikja lögregluna á Íslandi.

„Þessi vilji hefur endurspeglast í athöfnum og athafnaleysi síðustu ríkisstjórna vegna málefna lögreglu og dugleysi stjórnarandstöðu til að benda á hið augljósa,“ segir í áskoruninni.

Hvetur lögreglufélag Austurlands almenning „til að skoða stefnu eða stefnuleysi stjórnmálaflokkana í löggæslumálum áður en gengið er til kjörklefa.“

• Blogga um frétt