ÖBÍ veitti hvatningarverðlaun

Hvatningarverðlaun Öryrkjabandalags Íslands voru veitt í tíunda sinn við hátíðlega athöfn í Hörpu í dag, á alþjóðadegi fatlaðs fólks. Verðlaun voru veitt í þremur flokkum en einnig voru veittir styrkir til íþróttafólksins sem keppti á Ólympíumóti fatlaðra í Brasilíu í september.

Verðlaunagripurinn var hannaður af Þórunni Arnadóttur vöruhönnuði en í tilkynningu frá Öryrkjabandalagi Íslands segir að megintilgangur verðlaunanna sé „að varpa ljósi á þá sem hafa með jákvæðum hætti stuðlað að einu samfélagi fyrir alla.“

Í flokki einstaklinga fékk Friðrik Sigurðsson, fyrrverandi framkvæmdastjóri Þroskahjálpar, verðlaun fyrir störf sín í þágu fólks með þroskahömlun og aðstandenda þeirra.

Í flokki fyrirtækja og stofnana var það verslunin Next (Dagsól ehf.) sem fékk verðlaun fyrir metnaðarfulla starfsmannastefnu en um 20% af starfsmönnum fyrirtækisins eru með skerta starfsgetu.

Í flokki umfjöllunar eða kynningar fékk hreyfingin Tabú verðlaun fyrir fræðslu og markvissa umfjöllun um stöðu fatlaðs fólks í samfélaginu.

Þá fengu Helgi Sveinsson spjótkastari, Jón Margeir Sverrisson sundmaður, Sonja Sigurðardóttir sundkona, Thelma Björg Björnsdóttir sundkona og Þorsteinn Halldórsson bogfimimaður styrki frá Öryrkjabandalaginu en bandalagið ákvað í haust að styrkja ólympíufarana fimm um samtals eina milljóna króna.

Verðlaunahafar Hvatningarverðlauna ÖBÍ 2016. Fv. Friðrik Sigurðsson, Embla Guðrúnar Ágústsdóttir og Þorbera Fjölnisdóttir frá Tabú og Árni Sv. Mathiesen frá Dagsól ehf./Next Ljósmynd/Silja Rut

• Blogga um frétt