Friðrik Ólafsson stórmeistari í skák opnaði í dag formlega nýja vefsíðu, skakkennsla.is. Á henni er að finna fjölbreytt úrval kennslumyndbanda í skák.
Markmiðið með gerð vefsíðunnar er að auðvelda aðgengi að náms- og kynningarefni á íslensku um skák sem einkum nýtist börnum sem eru að læra að tefla, skákkennurum í skólum og foreldrum sem vilja hjálpa börnum sínum með að verða betri skákmenn. Á vefnum er að finna rúmlega 120 kennslumyndbönd bæði fyrir byrjendur og lengra komna, að því er kemur fram í tilkynningu.
Vefsíðan er samstarfsverkefni Skáksambands Íslands og GAMMA Capital Management og er ætlunin að fjölga myndböndunum eftir því sem tíminn líður.
Í tilkynningunni segir að Skáksamband Íslands og GAMMA vonist til að verkefnið verði íslensku skáklífi mikil lyftistöng í framtíðinni og muni gagnast börnum vel sem kennsluefni í skák.
Kennsluefnið skiptist í megingreinar skáklistarinnar; miðtöfl, endatöfl og byrjanir, auk þess eru frægum skákum úr skáksögunni gerð skil ásamt myndböndum sem fjalla um feril íslensku stórmeistaranna.
Vefsíðan var formlega tekin í notkun í Rimaskóla í dag og við það tilefni var spilað myndband um feril Friðriks Ólafssonar. Hann varð Íslandsmeistari í skák aðeins 17 ára gamall og Norðurlandameistari ári síðar. Hann varð stórmeistari í skák fyrstur Íslendinga árið 1958, þá 23 ára gamall.
„Það er ánægjulegt að vönduð kennsluvefsíða um skák fyrir börn sé komin í gagnið. Það er von mín að vefsíðan verði vel sótt og hafi jákvæð áhrif á skákiðkun barna, foreldra og kennara. Skák er einstaklega skemmtileg, eflir rökhugsun, einbeitingu og sköpunargáfu sem styrkir jafnframt námsgetu barna,“ segir Friðrik í tilkynningunni.
Höfundur kennslumyndbandanna er Björn Ívar Karlsson, sem hefur FIDE-þjálfaragráðu og er einn reyndasti skákkennari landsins.