Grænlenski togarinn Polar Nanoq kom til Hafnarfjarðar á tólfta tímanum í kvöld eftir um sólarhringssiglingu. Búið er að leiða skipverjana þrjá sem hafa stöðu grunaðra í málinu frá borði og hafa þeir verið fluttir á lögreglustöðina við Hverfisgötu. Eru þeir allir grunaðir um að búa yfir upplýsingum um hvarf Birnu Brjánsdóttur aðfaranótt laugardags.
Nokkrir lögreglumenn fylgja hverjum hinna grunuðu, en mönnunum virðist vera haldið aðskildum.
Bílalest fólks sem hafði fylgst með aðgerðum lögreglu í kvöld, elti lögreglu upp á Hverfisgötu. Þá hljóp strákur inn í bílaport lögreglu með myndavél er fyrsti lögreglubíllinn kom með mennina á lögreglustöðina og ýtti lögregla honum út af svæðinu.
Nokkur hópur lögreglumanna er enn vettvangi, en fyrr í kvöld var greint frá því að tæknideild lögreglunnar myndi skoða skipið er það kæmi til hafnar.
Skipinu var snúið við á leið sinni til Grænlands í gær eftir að lögreglan óskaði eftir að skipið kæmi hingað til lands aftur. Um hádegi í dag voru tveir skipverjar um borð handteknir af sérsveitarmönnum ríkislögreglustjóra og síðar um daginn var greint frá því að þriðji skipverjinn hefði verið handtekinn. Eru þeir allir grunaðir um að búa yfir upplýsingum um hvarf Birnu Brjánsdóttur aðfaranótt laugardags.
Settir voru upp gámar til að takmarka sýn að skipinu og þá lokaði lögreglan hafnarsvæðinu. Fjölmiðlafólki var þó hleypt örlítið nær.