Nóg hefur verið að gera í blómabúðum landsins í dag, konudaginn, enda annasamasti dagur ársins þegar kemur að blómasölu. Í versluninni Ísblómum á Háaleitisbraut var fjölmennt þegar ljósmyndara mbl.is bar að garði. „Það hefur verið brjáluð sala yfir daginn,“ segir Eva Ruza, dóttir eiganda búðarinnar og starfsmaður, í samtali við mbl.is. Hún segir að í dag hafi selst á annað þúsund rósir og að farið hafi verið í tvær ferðir til að fylla á.
„Búðin er núna orðin eins og eyðimörk,“ segir Eva hlæjandi og bætir við að allar rósir séu uppseldar. Segir hún að líkja megi þessum nokkru klukkustundum í dag við alla söluna í desembermánuði. Þá sé salan í dag enn mun meiri en á Valentínusardaginn sem var núna fyrr í febrúar. Eini dagurinn sem kemst nálægt sölunni þennan dag er mæðradagurinn að hennar sögn.
Eva segir að meðan Valentínusardagurinn sé vinsælli hjá ungum kærustupörum komi öll flóran á konudaginn. Þannig hafi yngsti kaupandinn í dag verið þriggja ára strákur sem vildi kaupa rós handa ömmu sinni. Hún segir að umferðin hafi byrjað strax við opnun klukkan átta í morgun og staðið alveg fram til sex þegar auglýstur lokunartími sé á sunnudögum. Þær hafi þó opið eitthvað áfram meðan frágangur fer fram fyrir þá sem hafi gleymt sér í dag.
Miðað við fyrri ár segir Eva að búast megi við talsverðri umferð á morgun líka, en þá komi venjulega þeir sem ekki hafi verið í bænum eða jafnvel þeir sem gleymdu sér alveg.