Tóku vart eftir að íslenskan fisk vantaði

Sjómannaverkfallið hefur vakið upp fjölmargar spurningar.
Sjómannaverkfallið hefur vakið upp fjölmargar spurningar. mbl.is/Eggert

„Það er sláandi að erlendir neytendur hafi varla tekið eftir því að íslenskur fiskur hafi ekki verið fáanlegur í þó nokkurn tíma,“ segir Þór Sigfússon hjá Sjávarklasanum við mbl.is. Hann segir margt megi læra af nýloknu níu vikna sjómannaverkfalli, einkum á sviði markaðssetningar á íslenskum fiski.

Hann kallar eftir aukinni samvinnu allra þeirra í matvælaiðnaðinum sem selja sjávarafurðir. „Það eru miklu meiri tækifæri í samvinnu. Við finnum fyrir auknum áhuga á Íslandi en við virðumst ekki nýta okkur það nægilega vel beint til neytandans. Við þurfum að beita okkur betur fyrir því að selja ímynd íslenskra sjávarafurða,“ segir Þór. Hann nefnir dæmi um norskar sjávarafurðir sem nokkuð vel heppnaða markaðssetningu þar sem náð er beint til erlendra neytenda sem þekkja vel ímynd norskra sjávarafurða frá öðrum.   

Milliliðir taka sitt

Þór bendir á að þrátt fyrir að á síðustu árum hafi nýting á öllum fiskafurðum aukist til muna, eins og ný tækni í fullvinnslu og fleira í þeim dúr, sitji ekki nægilega mikið af fjármunum eftir hjá íslenskum fyrirtækjum heldur fari það í auknum mæli til annarra milliliða. „Þetta er eitt dæmi sem við getum skoðað hvernig við getum selt fiskinn okkar til dæmis beint á netinu,“ segir Þór. 

Hann ítrekar að tækifærin séu víða en næsta skref sé að ræða um þessa hluti og vinna saman. Hins vegar bendir hann á að blikur séu á lofti um frekari sundrung en sameiningu.

„Getum við notað áföll til að hugsa hlutina upp á nýtt?“ er yfirskrift nýs pistils frá Sjávarklasanum

mbl.is

Bloggað um fréttina

Fleira áhugavert
Fleira áhugavert