Í fyrramálið hvessir mjög af suðaustri og hlýnar hratt. Engu að síður verður úrkoman snjókoma eða slydda framan af degi en síðar rigning. Suðaustanstormur eða -rok verður víða um land eftir hádegi og mjög slæmt ferðaveður.
Þetta kemur fram á vefsíðu Veðurstofu Íslands.
Óli Þór Árnason, veðurfræðingur hjá Veðurstofu Íslands, segir að versta veðrið muni taka 5 til 6 tíma að ganga yfir hvern landshluta á morgun.
Hann býst við miklu roki á Kjalarnesi og undir Hafnarfjalli, auk þess sem mjög slæmt veður verður á Hellisheiðinni. Þar mun veðrið líklega ná hámarki upp úr hádegi. Búist er við blindhríð á Hellisheiðinni og hefur Vegagerðin greint frá því að hún verði líklega lokuð.
Að sögn Óla Þórs byrjar að hvessa á höfuðborgarsvæðinu strax í fyrramálið, upp úr klukkan sex með úrkomu, og versta veðrið þar verður á milli klukkan 14 og 17. Búist er við meðalvindi á milli 20 og 28 metrum á sekúndu. Veðrið verður sérlega slæmt í efri byggðum, þar á meðal í Grafarholti, Salahverfinu og efri hluta Árbæjarins.
Annars staðar á landinu nær veðrið líklega hámarki á milli klukkan 17 og 18.
Þegar nánar er skoðað eru veðurhorfur á landinu á þá leið, samkvæmt Veðurstofunni, að suðaustlæg átt, 8-15 metrar á sekúndu, verður fram á nótt en annars yfirleitt 3 til 10 metrar á sekúndu.
Víða verða él en snjókoma eða slydda austan Öræfa. Hiti verður í kringum frostmark.
Í fyrramálið verður vaxandi suðaustanátt, fyrst suðvestan til, og víða verða 20 til 28 metrar á sekúndu síðdegis. Snjókoma eða slydda verður og síðan rigning.
Talsverð eða mikil rigning verður um tíma suðaustanlands seint á morgun og hlýnar í veðri. Snýst í mun hægari sunnan- og suðvestanátt, fyrst suðvestan til undir kvöld, með skúrum eða éljum. Hiti verður á bilinu 1 til 7 stig.
Búist er við að versta veðrið á Reykjanesbraut verði um og upp úr hádeginu. Á Facebook-síðu Veðurstofunnar er fólk hvatt til að athuga fréttir af veðri og færð áður en lagt er af stað enda er ekki spáð neinu ferðaveðri.