Möguleiki er á því að stóriðja á Akranesi eigi þátt í því að fleiri greinist með mergæxli þar en annars staðar á landinu. Stóriðjan er meðal þeirra umhverfisþátta sem sérstaklega verða athugaðir í almennri rannsókn Háskóla Íslands á mergæxlum sem Sigurður Yngvi Kristinsson, prófessor í blóðsjúkdómum, fer fyrir.
Fyrstu niðurstöður úr skimunarhluta verkefnisins, Blóðskimun til bjargar, benda til þess að um 5,2% Íslendinga hafi forstig mergæxlis.
„Við vitum að á Akranesi hafa fleiri greinst með mergæxli undanfarin ár, en við höfum ekki enn niðurstöður úr skimun á Akranesi,“ segir Sigurður Yngvi í Morgunblaðinu í dag, en hann segir að von sé á þeim niðurstöðum á næstu vikum.