Innanlandsflug er hafið á ný eftir að hafa legið niðri í morgun vegna veðurs. Flestar ferðir Flugfélags Íslands frá Reykjavík eru á áætlun fyrir utan 1 og hálfs tíma seinkun á ferð félagsins til Akureyrar og þá hefur ferð til Ísafjarðar verið aflýst.
„Það er veðrið sem er yfir landinu í dag sem gerir það að verkum að við erum ekki að ná að fljúga innanlands,“ sagði Árni Gunnarsson, framkvæmdastjóri Flugfélags Íslands í samtali við mbl.is í morgun. Staðan var athuguð að nýju klukkan 12:15 og síðan þá hafa tvær vélar lagt af stað til Grænlands og svo á ein til Egilsstaða að fara í loftið núna klukkan 14:40.
Ferð Flugfélags Íslands til Akureyrar klukkan 16:10 er á áætlun sem og ferð til Egilsstaða klukkan 18.