Innlent | mbl | 27.3.2017 | 18:17 | Uppfært 28.3.2017 8:08

Á góðri leið með að fá heimili

Tjúasveitin (f.v.): Ísól, Heba, Mikki og Max. Á myndina vantar Heru.

Dýrahjálp Íslands hafa borist fjölmargar fyrirspurnir um Tjúasveitina svokölluðu sem sagt var frá í Morgunblaðinu í dag. „Mikki og Max eru komnir mjög langt með það að fá heimili,“ segir Sonja Stefánsdóttir, sjálfboðaliði hjá Dýrahjálp og umsjónarmaður hundanna, í samtali við mbl.is.

Frétt af mbl.is

Tjúasveitin leitar stuðnings

Dýrahjálp hóf nýverið söfnun fyrir dýralæknakostnaði vegna Chihuahua-hundanna Ísólar, Hebu, Mikka, Max og Heru sem skipa Tjúasveitina en þá vantar alla heimili. Flestar umsóknir hafa borist í Mikka sem er yngstur en Sonja segir einhverja ætla koma og heimsækja Ísól í dag og á næstu dögum.

„Við erum síðan enn að reyna að ákveða hvort Heba og Hera eigi að vera saman. Það var planið en sú sem fóstrar þær var núna að segja að þær myndu örugglega standa sig vel í sitt hvoru lagi.“

Þegar Dýrahjálp fékk til sín hundana fimm þurftu þeir á mikilli umönnun að halda. Þeir voru með of langar klær, flækjur og skítugir og þurftu að fara í snyrtingu. Í heilsufarsskoðun kom síðan í ljós að fjórir af fimm þurftu að fara í tannhreinsun og tanntökur.

„Það þurfti röntgenmyndir af þeim og svo voru sumir það gamlir að þeir þurftu að fara í blóðprufur áður en þeir voru svæfðir þannig að kostnaðurinn safnaðist hratt saman,“ sagði Sonja í samtali við Morgunblaðið í morgun.

Dýrahjálp stendur því fyrir söfnun til að borga fyrir dýralæknakostnaðinn, sem er yfir hálfri milljón. Átakið fór vel af stað og söfnuðust höfðu 195.000 krónur í gær en í samtali við mbl.is sagðist Sonja ekki vera komin með nýjustu tölur. Hægt er að leggja inn á reikning Dýrahjálpar 0513-26-4311, kt. 620508-1010 og skrifa „Tjúasveitin“ í athugasemd.

Þeir sem hafa áhuga á að taka meðlimi Tjúasveitarinnar að sér geta sótt um á vef Dýrahjálpar Íslands.