„Það er talsverður snjór til fjalla og nýlegir flekar sem hafa komið í skafrenningnum í vikunni. Það er alltaf hætta á að snjóflóð geti orðið af mannavöldum í þessum aðstæðum. Fólk sem ferðast í bröttum fjallshlíðum þarf að kunna að meta aðstæður eins og snjóalög, mögulega snjóflóðahættu og velja því leiðirnar vel,“ segir Harpa Grímsdóttir snjóflóðafræðingur hjá Veðurstofu Íslands.
Karlmaður slasaðist alvarlega þegar hann lenti í snjóflóði í Esjunni um klukkan 13 í dag. Veðurstofunni hafa ekki enn borist upplýsingar um hvar nákvæmlega snjóflóðið féll.
Á vef Veðurstofu Íslands er hægt að kynna sér mat á snjóflóðahættu. „Víða er talsvert nýsævi til fjalla, sem gæti verið óstöðugt,“ segir á vefnum. Nokkur flóð hafa fallið á miðvikudaginn og fimmtudaginn og einnig féll eitt af mannavöldum á miðhálendinu á föstudag. Flestar tilkynningar um snjóflóð koma á þeim svæðum þar sem snjóathugunarmenn starfa.
Á vefnum er jafnframt gefin út snjóflóðaspá fyrir þrjú svæði, fyrir norðanverða Vestfirði, Austfirði og utanverðan Tröllaskaga. Vonir eru bundnar við að fyrir næsta vetur verði bætt við snjóflóðaspá fyrir fjalllendi í nágrenni höfuðborgarinnar. Það yrði því fjórða svæðisbundna spáin sem fólk geti nýtt sér sem ferðast í snjóalögum í fjalllendi.
„Spáin yrði ekki nákvæm fyrir einstakar brekkur. Fólk þarf að meta aðstæður sjálft út frá þeim upplýsingum sem það er með. Spá kemur ekki í veg fyrir slys. Það er alltaf hætta á að menn geti sett af stað snjóflóð og því mikilvægt að menn séu vel búnir,“ segir Harpa.
Vetraraðstæður eru ennþá til fjalla, sérstakalega í efri hluta fjalla. Fólki fjölgar sem ferðast til fjalla á þessum árstíma, að sögn Hörpu. Hún ítrekar í þeim aðstæðum er mikilvægt að fólk kynni sér vel aðstæður.