Áætlaður kostnaður við miklar og óumflýjanlegar viðgerðir á Skálholtskirkju gæti orðið allt að 120 milljónir króna.
Steindir gluggar og altaristafla eru skemmd og kostnaður við lagfæringar á þeim listaverkum gæti orðið um 40 milljónir króna. Þá eru eftir endurbætur á kirkjunni sjálfri, sem laskaðist talsvert í Suðurlandsskjálftunum árið 2000 og 2008.
Að sögn Kristjáns Vals Ingólfssonar vígslubiskups hefur Þjóðkirkjan ekki úr miklu að spila til að mæta viðgerðarkostnaði og því er málið í ákveðinni blindgötu, að því er fram kemur í umfjöllun um viðgerðir á Skálholtskirkju í Morgunblaðinu í dag.