Vara við ávísunum á kröftuga hóstamixtúru

Mikil aukning hefur orðið í ávísunum kröftugrar hóstamixtúru sem inniheldur umtalsvert magn af kódeini sem er ávanabindandi efni. Börnum er gefin mixtúran í auknum mæli.

Þetta kemur fram í grein á vef embættis landlæknis. Í greininni kemur fram að almennt hafi nokkur aukning átt sér stað í ávísunum lyfja sem innihalda kódein. Eitt lyf sker sig þó úr og það er SEM-mixtúra sem inniheldur umtalsvert magn af kódeini (2,53 mg/ml). Hver barnaskeið (10 ml) af mixtúrunni inniheldur um 25 mg af kódeini.

Til samanburðar inniheldur ein tafla af Parkodin forte 30 mg af kódeini og er því um sterkt lyf að ræða, segir í grein á vef landlæknis. SEM-mixtúran er mikið notuð við hósta. Samfara mikilli aukningu í notkun mixtúrunnar handa börnum hefur þeim börnum fækkað sem fengu Parkodin eða Parkodin forte.

Á árunum 2012-2016 varð í öllum aldursflokkum meira en tvöföldun á þeim fjölda einstaklinga sem fékk ávísað SEM-mixtúru.

SEM-mixtúra er forskriftarlyf læknis, engar upplýsingar eða fylgiseðill fylgir lyfinu og eru þar af leiðandi engar leiðbeiningar eða aðvaranir. Ópíóíðar eins og t.d. morfín og kódín hafa almennt margar aukaverkanir. Meiri líkur eru á að aukaverkanir komi fram séu þeir teknir í óhóflegu magni eða af þeim sem þeir eru ekki ætlaðir.

Alvarlegasta aukaverkun ópíóíða er öndunarbæling og eru vissir hópar, m.a. börn og aldraðir, viðkvæmari en aðrir. Þeir sem umbrjóta kódein hratt eru í verulegri hættu á að fá alvarlegar aukaverkanir.

Alls fengu 5.844 einstaklingar ávísað árið 2016 sem er 19% aukning frá 2015. Á undanförnum 12 mánuðum hafa yfir 30 einstaklingar leyst út 7 pakkningar eða meira og eru dæmi um að aðrir ópíóíðar séu teknir með mixtúrunni. Þetta eru vísbendingar um að fólk með fíknivanda sæki í þessi lyf, að því er fram kemur í greininni.

Embætti landlæknis varar við ávísunum kódeins á börn og einnig þeirri misnotkunarhættu sem af kódeini getur stafað en það umbreytist í morfín í líkamanum sem er mjög ávanabindandi verkjalyf.

Leiðbeiningar um notkun kódeins:

1. Kódein á ekki að gefa börnum yngri en 12 ára.
2. Kódein á ekki að gefa börnum yngri en 18 ára eftir brottnám háls- eða nefeitla.
3. Kódein á ekki að gefa sjúklingum með öndunarfærasjúkdóma.
4. Kódein á einungis að gefa í stuttan tíma og í eins litlum skömmtum og kostur er.
5. Sjúklingar sem vitað er að umbrjóta kódein hratt eiga ekki að fá lyfið.
6. Kódein á hvorki að gefa á meðgöngu né mæðrum með barn á brjósti.
7. Kódein á ekki að gefa fólki með fíknisögu.

• Blogga um frétt