Enn í tjaldinu tveimur vikum síðar
Setja bókamerki
Konan sem ákvað í byrjun ágúst að gista í tjaldi í Laugardalnum með syni sínum vegna húsnæðisskorts er enn í sama tjaldi, tveimur vikum síðar.
Reykjavíkurborg hefur enn ekki tekist að leysa úr vanda hennar en það gæti þó gerst í lok þessarar viku.
Konan, sem heitir Lilja Helga Steinberg Matthíasdóttir, hefur verið í sex ár á biðlista hjá borginni eftir félagslegu húsnæði.
„Blautt og ógeðslegt“
Hún kveðst vera að bíða eftir lista yfir húsnæði sem borgin átti að fá síðastliðinn mánudag en vinna átti úr honum í vikunni. Í framhaldinu stóð til að hafa samband við Lilju Helgu vegna mögulegs húsnæðis.
„Ég hélt að þetta myndi ganga hraðar, ég var að vonast til þess,“ segir hún. „Þetta er orðið alltof langur tími. Þetta er búið að vera blautt og ógeðslegt.“
Hún vonast til að mál hennar leystist áður en kólna tekur í veðri. „Ég er að vona að það sé verið að vinna í þessu og að ég fái góðar fréttir ekki seinna en á föstudag.“
Ótrúlega bjartsýn
Þegar mbl.is hafði síðast samband við hana var henni boðið stærra, sex manna tjald, til afnota en hún hefur ekki þegið það. Sjálf gistir hún í tveggja manna tjaldi með tæplega tvítugum syni sínum.
Síðan þá hefur ein kona haft samband við hana og boðið henni herbergi til leigu en Lilja vildi bíða aðeins lengur í von um að Reykjavíkurborg komi henni til aðstoðar. „Maður er alltaf svo bjartsýnn, það er alveg ótrúlegt.“
Fiskikóngurinn: „Mér fannst sárt að heyra það“
Sáttur við sína stöðu og finnur fyrir meðbyr
„Þetta náttúrulega endar með ósköpum“
Bifreið ekið á skrifstofu Útlendingastofnunar
Búið að bólusetja börn alla helgina
Katrín: Jóhönnustjórnin talaði máli Íslands
Átta morðmál á aðeins tólf mánuðum