Kvenfélagið Hringurinn færði fósturgreiningardeild Landspítala tvö ómtæki að gjöf og voru þau afhent formlega í þakkarboði sem haldið var Hringskonum í dag.
Tækin voru af gerðinni General Electric og nemur andvirði tækjanna nemur 21 milljón króna.
Árlega eru framkvæmdar á milli 10-11 þúsund ómskoðanir á fósturgreiningardeild Landspítalans og á hverju ári greinast 50 til 70 fósturgallar og skiptir þá máli að hafa góðan tækjabúnað.
Þétt eftirlit er með fóstrum sem eiga erfitt uppdráttar í móðurkviði m.a. vegna vaxtarseinkunar eða veikinda móður.
Í fréttatilkynningu frá Landspítalanum segir að nýju tækin auðveldi til muna flóknari ómskoðanir, líkt og blóðflæðimælingar bæði í naflastreng og í kolli fósturs þar sem tækin eru mun betri en þau sem fyrir voru.
Þá verði auk þess hægt að fjölga skoðunarstofum úr fimm í sex með tilkomu nýju tækjanna.