Heldur fer að hvessa í kvöld suðvestanlands en í nótt og fyrramálið má gera ráð fyrir hviðum allt að 30 m/s á Reykjanesbraut samfara slagveðursrigningu. Gert er ráð fyrir 30-35 m/s á Kjalarnesi, undir Hafnarfjalli og undir Eyjafjöllum.
Þetta kemur fram í tilkynningu frá Vegagerðinni.
Þar segir enn fremur að lítið eitt muni draga úr þessum hvassa vindi á morgun. Á Norðurlandi eru hálkublettir á Mývatnsöræfum. Á Vestfjörðum eru hálkublettir á Steingrímsfjarðarheiði, Hrafnseyrarheiði og á Þröskuldum.
Hvalfjarðargöng verða lokuð fyrir umferð í tvær nætur í þessari viku vegna viðhalds og hreingerningar. Lokað verður aðfaranætur miðvikudagsins 18. og fimmtudagsins 19. október frá miðnætti til kl. 6 að morgni.