Tvöfalt fleiri kennarar á sjúkradagpeningum

Útlit er fyrir að fjöldi þeirra kennara sem fá sjúkradagpeninga úr sjúkrasjóði Kennarasambandsins muni tvöfaldast á milli ára og að stór hluti af heildarútgjöldum sjóðsins verði vegna þessara greiðslna.

Talsverðan hluta þessara veikinda má rekja til álags í starfi. Sjúkradagpeningar eru greiddir þeim sem lenda tímabundið út af launaskrá vegna veikinda eða slyss og eru greiddir eftir að veikindarétti sleppir, að því er fram kemurí Morgunblaðinu í dag.

Fyrr í þessari viku greindi blaðið frá því að frá og með næstu mánaðamótum myndi sá tími sem félagsmenn KÍ eiga rétt á sjúkradagpeningum skerðast um 25% vegna mikillar fjölgunar kennara sem eru frá vinnu í lengri tíma vegna veikinda. Þar sagði Kristín Stefánsdóttir, formaður stjórnar sjúkrasjóðs KÍ, að héldi þessi þróun áfram myndi sjóðurinn tæmast eftir ár og verið væri að bregðast við því.