„Þetta var mjög vel heppnaður og góður fundur. Það var gott að eiga samtal við fulltrúa frá lögreglunni í nærumhverfi,“ segir Árni Guðmundsson, formaður Félags sjálfstæðismanna í Grafarvogi, um fund sem félagið stóð fyrir á laugardag.
Þar mætti Kristján Ólafur Guðnason, aðstoðaryfirlögregluþjónn og stöðvarstjóri á lögreglustöðinni að Vínlandsleið í Grafarholti, og ræddi við fundargesti um löggæslu í hverfinu.
Árni segir íbúa í Grafarvogi hafa haft nokkrar áhyggjur af aukinni tíðni innbrota undanfarið og þau mál voru til umræðu á fundinum, að því er fram kemur í umfjöllun um hann í Morgunblaðinu í dag.