„Þú vildir þetta, þú veist það“

Málið var dæmt í Héraðsdómi Reykjaness
Málið var dæmt í Héraðsdómi Reykjaness mbl.is/Ófeigur

Karlmaður var á föstudag fundinn sekur um að hafa nauðgað stúlku á heimili hennar árið 2016. Hvorugt þeirra hafði náð 18 ára aldri á þeim tíma. Var hann dæmdur í þriggja ára óskilorðsbundið fangelsi ásamt því að greiða henni 1,5 milljónir í miskabætur.

Í dómi héraðsdóms kemur fram að brotaþoli og hinn dæmdi þekkist síðan úr grunnskóla og hafi hann áreitt hana síðan þá. Þegar þau voru í 10. bekk hafi hann króað hana af inni á salerni og nauðgað henni. Undanfarið hafi hann áreitt hana í gegnum samfélagsmiðla. Þá hafi hann nú í haust hafið nám við sama framhaldsskóla og hún sem hafi valdið henni verulegri þjáningu. 

Hann hafi þrábeðið brotaþola um að fá að koma til hennar og sýna henni myndir sem hann hafi teiknað. Hún hafi ákveðið að treysta honum en þegar hann kom var hann ekki með neina mynd. Hann hafi strax gengið á hana og hún hafi ýtt honum frá sér og farið fram.

Hann hafi elt hana og hún barist á móti honum í tvær klukkustundir. Þegar hann fór hafi hann sagt: „Þú vildir þetta, þú veist það.“ Brotaþoli var ein heima þegar hann nauðgaði henni.

Segir í dómnum að hinn dæmdi hafi átt mjög erfitt með að tjá sig fyrir dómnum og hafi oft og tíðum verið óskýr í máli. Telur dómurinn, í ljósi framburðar brotaþola og vitna sem styðja framburð hennar, framburð ákærða afar ótrúverðugan og að engu hafandi.

mbl.is
Fleira áhugavert
Fleira áhugavert