Vegirnir um Öxnadalsheiði og Víkurskarð eru lokaðir. Mývatns- og Möðrudalsöræfum vari lokað klukkan 18. Ófært er um Dalsmynni, Hólasand og Dettifossveg en þungfært inn í Fnjóskadal.
Þetta kemur fram á vef Vegagerðarinnar.
Hálka eða snjóþekja og éljagangur eða skafrenningur er á Austurlandi og versnandi veður. Þæfingsfærð og skafrenningur er á Vopnafjarðarheiði og á Fagradal. Ófært er einnig á Fjarðarheiði, Vatnsskarði eystra, Breiðdalsheiði og Öxi.
Vetrarfærð er á vegum á Suðurlandi, hálkublettir, hálka, snjóþekja eða krapi.
Hálka eða snjóþekja er víða á Vesturlandi. Þungfært er á Fellsströnd og á Skarðsströnd. Hálka og skafrenningur er á Bröttubrekku og Holtavörðuheiði.
Hálka eða hálkublettir eru á Suðausturlandi.
Í ábendingum frá veðurfræðingi kemur fram að spáin fyrir Austfirði hafi versnað. Reiknað er með umtalsverðri snjókomu og miklu hríðarveðri, einkum á fjallvegum. Vakin er athygli á snjóflóðahættu til fjalla á Austfjörðum. Einnig snjóar samfara allhvössum vindi norðaustanlands allstvestur í Eyjafjörð og á Öxnadalsheiði.
Veðurstofa Íslands spáir vaxandi norðaustanátt og bætir í ofankomu fyrir norðan. 10 til 20 metrar á sekúndu verða í kvöld en 13 til 23 metrar á sekúndu á morgun, hvassast um landið norðan- og vestanvert og undir Vatnajökli.