Nemendur í Fjölbrautaskóla Suðurnesja ráða sjálfir hversu mikið þeir mæta í skólann upp að vissu marki. Ef fjarvistir fara yfir það er litið svo á að nemandi hafi sagt sig úr náminu. Þetta segir Kristján Ásmundsson, skólameistari Fjölbrautaskóla Suðurnesja.
Nemendur geta verið frá skóla í allt að þrjár vikur á önn án þess að vera vísað úr áfanga. Í próflausum áföngum eru stífari mætingareglur, að því er fram kemur í umfjöllun um mál þetta í Morgunblaðinu í dag.
Ákvörðun um breytta mætingarskyldu kom til vegna misnotkunar nemenda á læknisvottorðum en dæmi eru um það að nemendur hafi skilað læknisvottorðum þá daga sem þeir voru á ferðalagi erlendis.