Þátttakendur í hjólreiðakeppninni WOW Cyclothon munu safna áheitum fyrir Slysavarnafélagið Landsbjörg, annað árið í röð. Í keppninni, sem verður haldin í sjöunda sinn dagana 26. - 30. júní, hjóla einstaklingar og lið hringinn í kringum Ísland.
Í tilefni af ákvörðuninni um að styrkja Landsbjörg þáðu Skúli Mogensen og Magnús Ragnarsson, stofnendur WOW Cyclothon, boð björgunarsveitarinnar Ársæls um að taka þátt í björgunaræfingu á sjó. Þeir voru settir í sjóinn fyrir utan Seltjarnarnes þaðan sem þeim var bjargað í vel skipulagðri aðgerð.
„Björgunarsveitirnar eru eitt af mikilvægustu málefnunum sem Íslendingar geta stutt. Við eigum þeirra starfi mikið að launa og það er ótrúlegt að sjá hversu mikið af fórnfúsu fólki er á vaktinni á hverjum degi til að tryggja öryggi okkar. Með því að styrkja Slysavarnafélagið Landsbjörg í fyrra hófst frábært samstarf sem við hlökkum til að halda áfram með í ár,“ er haft eftir Skúla Mogensen, forstjóra WOW air, í tilkynningu.
Slysavarnafélagið Landsbjörg eru landssamtök björgunarsveita og slysavarnadeilda á Íslandi. Á útkallslista félagsins eru um 4.200 karlar og konur um land allt sem eru reiðubúin til að leggja á sig mikla sjálfboðavinnu, oft við erfiðar aðstæður, alla daga ársins.
„Öflugur stuðningur almennings og fyrirtækja er meginforsenda þess að hægt sé að halda úti öflugu slysavarna- og björgunarsveitastarfi í landinu, enda er allt slíkt starf unnið í sjálfboðavinnu. WOW Cyclothon sýnir nú Slysavarnafélaginu Landsbjörg stuðning sinn í verki öðru sinni með því að láta áheit af hjólreiðakeppninni í ár renna til félagsins. Fyrir það erum við afskaplega þakklát,“ er haft eftir Jóni Svanberg Hjartarsyni, framkvæmdastjóra Slysavarnafélagsins Landsbjargar, í tilkynningu.
WOW Cyclothon hefur jafnan verið vel sóttur viðburður en á síðasta ári var metþátttaka þar sem yfir 1.200 hjólreiðamenn tóku þátt. Áheitasöfnunin er stór hluti af keppninni og hefð er fyrir því að ljá góðu málefni lið. Skráning í WOW Cyclothon stendur nú yfir á heimasíðu keppninnar og lýkur 31. maí.