„Lítill lundi með stórt hjarta“

Hinn víðfrægi Tóti lundi hefur kvatt þennan heim fyrir fullt og allt. Tóti bjó á Sæheimum, fiska- og náttúrugripasafni Vestmannaeyja, frá því að hann var pysja, en hann var sjö ára þegar hann féll frá.

Tóti átti aðdáendur um allan heim og eru þess augljós merki á ferðasíðunni Trip Advisor. Þar dásamar ferðafólk hann og gjarnan er hann sagður hápunktur heimsóknarinnar á safnið.

Í Morgunblaðinu í dag segir að í færslu á Fésbókarsíðu Sæheima sé mikilli sorg lýst yfir vegna fráfalls Tóta. „Hans verður sárt saknað bæði af starfsfólkinu og lundavinum hans á safninu. Tóti var hvers manns hugljúfi og átti aðdáendur um allan heim sem munu sömuleiðis sakna þessa ljúfa lunda. Tóti var lítill lundi, með stórt hjarta sem gladdi marga.“