„Ég skynja mjög mikinn kraft í atvinnulífinu en ég held því miður að þetta geti verið bara toppurinn á ísjakanum,“ segir Hulda Ragnheiður Árnadóttir, stjórnarkona FKA, félags kvenna í atvinnulífinu.
FKA sendi frá sér yfirlýsingu í gær vegna uppsagnar Áslaugar Thelmu Einarsdóttur úr starfi sínu hjá Orku náttúrunnar (ON). Stjórn FKA fjallaði um málið á fundi í gær og lýsti yfir vanþóknun á því hvernig hefur verið staðið að málinu innan Orkuveitu Reykjavíkur, móðurfyrirtækis ON.
Stjórn Orku náttúrunnar, dótturfélags OR, ákvað á miðvikudag að segja Bjarna Má Júlíussyni, framkvæmdastjóra félagsins, upp störfum vegna óviðeigandi framkomu gagnvart starfsfólki.
Skömmu eftir yfirlýsingu FKA barst tilkynning frá Bjarna Bjarnasyni, forstjóra Orkuveitu Reykjavíkur, þar sem hann óskar eftir því að stíga tímabundið til hliðar sem forstjóri á meðan úttekt innri endurskoðunar Reykjavíkurborgar á málum og vinnustaðamenningu Orkuveitu Reykjavíkur fer fram.
FKA skoraði á stjórn Orkuveitu Reykjavíkur að rannsaka aðkomu forstjóra OR að máli Áslaugar Thelmu og fyrrverandi framkvæmdastjóra ON til hlítar. Hulda Ragnheiður segir að FKA hafi ekki gert kröfu um afsögn forstjóra OR.
„Okkar hugmyndir snúast fyrst og fremst um það að það sé gerð úttekt á vinnustaðamenningunni og okkur er fyrst og fremst umhugað um þær konur sem eru á vinnustaðnum. Það sem er mikilvægast er að líðan fólks á vinnustaðnum og virðingin sem borin er fyrir fólkinu komist í lag,“ segir Hulda Ragnheiður.
FKA leggur áherslu á að sá sem fari með rannsókn málsins njóti trausts. „Þetta eru mjög viðkvæm mál sem fjallað er um og það þarf að vera einhver sem getur gætt algjörs hlutleysis og á ekkert undir þeim niðurstöðum sem koma til með að verða úr því. Einstaklingar sem starfa hjá sama eiganda eru því kannski orðnir í vafasamri stöðu hvað hlutleysi varðar. Það mega engir hagsmunir liggja undir hjá þeim sem fer í að greina málið,“ segir Hulda Ragnheiður.
Brynhildur Davíðsdóttir, formaður stjórnar OR, tilkynnti í gærkvöldi að undirbúningur að rannsókn innri endurskoðunar Reykjavíkurborgar á umræddum málefnum OR væri þegar hafinn. Hildur Björnsdóttir, borgarfulltrúi Sjálfstæðisflokksins og stjórnarmaður í Orkuveitu Reykjavíkur, hefur bent á mögulega hagsmunaárekstra þar sem að Reykjavíkurborg á meirihlutann í Orkuveitunni.
Hulda Ragnheiður segist eiga von á mjög miklum breytingum í atvinnulífinu á næstu einu til tveimur árum og að mál Áslaugar Thelmu veiti konum óneitanlega kjark til að stíga fram.
„Það er þannig að þegar farið er að hreyfa við svona málum þá þora konur frekar að stíga fram. Það hafa konur haft samband við mig persónulega og fleiri konur innan stjórnar sem ég veit um, einmitt vegna þess að þær fá kjark þegar þær sjá hlutina ná einhverri hreyfingu til þess að tjá sig um málið.“
Hulda Ragnheiður segir vita um margar konur, sérstaklega konur í stjórnunarstöðum, sem hafa hingað til ekki þorað, stöðu sinnar vegna, að bera upp kvartanir vegna óviðeigandi hegðunar á vinnustað. Þá segist hún vita um dæmi þar sem uppsagnir eru sviðsettar í kjölfar þess tilkynninga um óviðeigandi hegðun starfsmanna. „Það sem að ég held að gerist núna er að það kemur upp á yfirborðið það sem hefur verið þaggað,“ segir hún.
FKA hefur lýst yfir stuðningi við Áslaugu Thelmu. „Við beitum okkur alltaf þegar við þurfum að beita okkur og í gær var okkur nóg boðið. Sú staða getur komið upp á hverjum degi. Við bregðumst við þegar á þarf að halda,“ segir Hulda Ragnheiður.