Hvorki borgarstjóri né fulltrúar hans hafa haft samband við utanríkisráðuneytið vegna flugs utanríkisráðherra og þingmanna í utanríkismálanefnd frá Reykjavíkurflugvelli um borð í flugmóðurskipið USS Harry S. Truman í gær. Þetta kemur fram í svörum utanríkisráðuneytisins við fyrirspurn mbl.is.
Dagur B. Eggertsson borgarstjóri sagði í gær ljóst að samkomulag ríkis og borgar frá 2013, þar sem kveðið var á um að allri umferð herflugvéla og flugi í þágu hertengdrar starfsemi skyldi hætt, hafi verið brotið þegar flogið var með utanríkisráðherra og nokkra þingmenn í utanríkismálanefnd um borð í flugmóðurskipið.
Spurningunni hvort utanríkisráðuneytinu hafi verið kunnugt um samkomulagið er samþykkt var að fljúga frá flugvellinum svarar ráðuneytið því til að samkvæmt loftferðalögum veiti utanríkisráðherra erlendum ríkisförum, þ.á m. herflugvélum, heimildir til yfirflugs og lendinga á Íslandi. „Tilkynnt var um ferðir vélanna til Isavia, embættis tollstjóra, ríkislögreglustjóra og Landhelgisgæslunnar. Öllum lagaskilyrðum fyrir viðkomu þessara flugvéla var því fullnægt,“ segir í svarinu.
„Þótt utanríkisráðuneytið hafi um áratugaskeið átt mjög farsæl samskipti og samstarf við sveitarfélög víða um land vegna varnarmála, og hyggst áfram eiga, þá breytir það ekki því að þau hafa ekki slíkar valdheimildir hvað varðar öryggis- og varnarmál.“
Því geti umræddur gjörningur milli innanríkisráðuneytis og Reykjavíkurborgar frá 2013 „ekki vikið til hliðar lögmæltum heimildum utanríkisráðherra til að gefa út yfirflugs- og lendingarleyfi til erlendra ríkisloftfara.“
Þá segir í svarinu að eins og sakir standa séu ekki fleiri slíkar ferðir fyrirhugaðar frá Reykjavíkurflugvelli.