Slökkvistarf við Hvaleyrarbraut í Hafnarfirði hefst aftur klukkan eitt í dag. Slökkvistarf var stöðvað um miðnætti í nótt vegna erfiðra skilyrða í myrkri.
„Við reiknum með að byrja aftur um eittleytið og fara á tveimur dælubílum. Þá ætlum við að ráðast á þetta og ráða niðurlögum eldsins,“ segir Eyþórs Leifsson, varðstjóri hjá slökkviliðinu á höfuðborgarsvæðinu.
Aðspurður segir Eyþór að það sé ekki mikið af glóðum sem eigi eftir að slökkva. „Við teljum að þetta sé svona viðráðanlegt.“
Tíu slökkviliðsmenn verða sendir á svæðið. „Við ætlum bara að vera þarna með mannskap og reyna að ráðast svolítið kröftuglega á þetta og slökkva þetta.“
Ekki er enn hægt að segja til um hvenær svæðið verði afhent lögreglu en Eyþór segir að það verði vonandi fljótlega. „Eins fljótt og auðið er. Við viljum náttúrulega losna við þetta.“
Eldurinn kviknaði á efri hæð Hvaleyrarbrautar 39 á ellefta tímanum á föstudagskvöld þar sem harðviðarverkstæði var til húsa. Eldsmatur í fyrirtækinu var talsverður og mikill vindur blés upp í öllum glóðum. Lítið stendur eftir af húsinu nema nokkrir steinsteyptir veggir.