Slökkviliðið á Akureyri var kallað út nú á ellefta tímanum í morgun eftir að tilkynnt var um þykkan svartan reyk frá útihúsi í Heiðarholti á Svalbarðsströnd.
Um var að ræða reykkofa sem eldur hafði komið upp. Eldurinn hafði einnig náð að teygja sig í vörubíladekk sem stóðu upp við kofann og áttu þau sinn þátt í umfangi reyksins.
Vel gekk hins vegar að slökkva eldinn er slökkviliðsmenn beittu froðu á hann.
Að sögn vaktstjóra hjá slökkviliðinu á Akureyri voru önnur hús á staðnum ekki í hættu, en reykkofinn er gjörónýtur.