„Þetta hefur gengið frábærlega,“ segir Ágúst Guðmundsson, einn slökkviliðsmannanna sjö sem eru búnir að róa stanslaust frá því á föstudag fyrir Frú Ragnheiði. Róðrinum lýkur á föstudag svo það er nóg eftir.
Þegar blaðamaður mbl.is heyrði í Ágústi í morgun var hann að undirbúa sig fyrir níunda róðurinn sinn, af 24, en hver slökkviliðsmaður rær klukkutíma í senn á sjö klukkustunda fresti. „Við fáum aðeins að anda á milli, orkustigið núna er ágætt en það er helst kannski svefninn sem mætti vera betri hjá öllum. En það verður bara að bíða þar til um jólin,“ segir Ágúst.
Upphaflegt markmið var að safna hálfri milljón til að kaupa ákveðið tæki fyrir Frú Ragnheiði, sem er verkefni Rauða krossins í Reykjavík og hefur það markmið að ná til jaðarsettra hópa í samfélaginu eins og heimilislausra einstaklinga og þeirra sem nota vímuefni í æð.
Tækið sem um ræðir kostar um fimm hundruð þúsund krónur og er eins konar vasaljós sem auðveldar að lýsa upp illa farnar æðar. Söfnunin fór það vel af stað að markmiðið náðist um helgina og þá var stefnan sett hærra og nú er markmiðið að safna einni milljón króna.
Í morgun höfðu safnast rúmlega 670.000 krónur en þá er ótalið það sem safnast hefur í stærðarinnar söfnunarbauk sem er fyrir utan verlsunina. Ágúst er bjartsýnn á að þeim takist að ná nýja markmiðinu en hann segir stuðninginn einnig skipta miklu máli. „Fólk er að gefa sér tíma til að róa með okkur sem er frábært. Félagi minn sem er bakari kom í morgun klukkan hálffimm, áður en hann fór í bakaríið, og það var algjör snilld,“ segir Ágúst, en hann viðurkennir að það geti verið ansi einmanalegt að róa á nóttunni annars. „Orkustigið er minna hjá öllum á nóttunni, það er bara þannig.“
Kílómetrarnir hrúgast inn og frá því söfnunin hófst síðdegis á föstudag hafa slökkviðliðsmennirnir sjö róið yfir 800 kílómetra. „Við erum að halda svipuðu tempói og við sjáum fram á að fara yfir 2.000 kílómetra eins og við lögðum upp með í upphafi,“ segir Ágúst.
Róðrinum lýkur klukkan 17 á föstudag og segir Ágúst að verkefnið fram undan sé verðugt. „Ég ætla ekki að segja að þetta verði ekkert mál. En verkefnið verður klárað það er ekki spurning, við erum öll að róa í sömu átt.“ Ágúst er hins vegar ekki byrjaður að telja niður skiptin sem hann á eftir að róa. „Í dag og á morgun snýst þetta um að halda dampi en þegar kannski svona einn og hálfur sólarhringur er eftir fer ég að leyfa mér að telja niður,“ segir hann.
Hægt er að leggja söfnunni lið með því að kíkja við í verslun Under Armour Kringlunni eða á vefsíðu Rauða krossins.