„Það er ekki útlit fyrir hvít jól í Reykjavík,“ segir Daníel Þorláksson, veðurfræðingur á Veðurstofu Íslands. Hálfgert haustveður hefur verið á landinu síðustu daga og ekki er líklegt að jólin verði hvít, nema þá kannski helst á norðausturhlutanum.
Daníel segir að spár geri ráð fyrir hæglætisveðri í vikunni en síðan komi lægð upp að landinu á Þorláksmessu. Úr henni snjói ef til vill örlítið í byrjun en skipti fljótt yfir í rigningu og sá snjór mun ekki tolla.
Spá vefsíðu Veðurstofunnar, vedur.is, nær ekki lengra en fram á Þorláksmessu en samkvæmt Norðmönnunum á yr.no verður huggulegt septemberveður í höfuðborginni á aðfangadag. Þar er gert ráð fyrir 3 til 6 stiga hita og rigningu allan daginn.
„Það verður rigning og auð jörð,“ segir Daníel.
Sé kort sem mælir snjódýpt á landinu skoðuð sést að eini snjórinn er á norðausturhorninu en þar segir að 45 sm flekkóttur snjór sé á Akureyri. „Miðað við það sem ég hef skoðað er víða flekkótt um norðanvert landið sem þýðir að það er ekki samfelld hvít jörð,“ segir Daníel.
Því er ólíklegt að það verði hvít jól einhvers staðar á landinu nema það fari að snjóa í vikunni. Daníel segir að ekki sé útlit fyrir það eins og staðan er núna.