Lögreglunni á höfuðborgarsvæðinu var tilkynnt um snjóhengju sem féll af húsi í Faxafeni á konu sem átti leið um.
Konan meiddist ekki en atvikið átti sér stað upp úr klukkan 15 í dag, að því er kemur fram í dagbók lögreglunnar.
Ökumaður var stöðvaður í akstri um sexleytið í dag og reyndist vera undir áhrifum fíkniefna.
Um hálfníuleytið í kvöld var tilkynnt um aðila sem tók ófrjálsri hendi síma og vegabréf af konu sem stödd var á hóteli í miðborginni. Málið er í rannsókn.
Bifreið hafnaði á ljósastaur við Ástún vegna hálku um hálfsjöleytið í kvöld. Enginn slasaðist og var bifreiðinni ekið af vettvangi.
Upp úr klukkan hálfátta í kvöld var óskað eftir aðstoð lögreglu vegna bifreiðar sem föst var í Þormóðsdal. Björgunarsveitin Kyndill var kölluð út.