Búið er að opna á umferð um Súðavíkurhlíð, en veginum var lokað í nótt eftir að snjóflóð féll að því er fram kemur á vef Vegagerðarinnar. Einnig er búið að opna Öxnadalsheiði á ný, en veginum var lokað í gærkvöldi vegna stórhríðar.
Á Vestfjörðum er þæfingur á Súðavíkurhlíð, Steingrímsfjarðarheiði, Þröskuldum og Klettshálsi. Snjóþekja, hálka eða hálkublettir er á öðrum leiðum og eitthvað um éljagang.
Á Vesturlandi er hálka og snjóþekja á norðanverðu Snæfellsnesi, en hálkublettir á nesinu sunnanverðu. Hálka er svo á Mýrunum, Holtavörðuheiði og Bröttubrekku. Hálka eða hálkublettir eru í Borgarfirði.
Það gengur á með suðvestankalda og dimmum éljum á vestanverðu landinu og eru ökumenn því hvattir til að aka varlega, sérstaklega á fjallvegum. Í nótt snýst í vaxandi norðaustanátt með snjókomu og hríðarveðri á austanverðu landinu og líklega munu verða samgöngutruflanir þar á morgun, samkvæmt upplýsingum frá Veðurstofu Íslands.
Á Norðurlandi eru hálkublettir á láglendi, en snjóþekja á fjallvegum. Éljagangur og skafrenningur er svo allvíða í Skagafirði og hálka á flestum útvegum.
Á Austurlandi er hálka á Vatnsskarði eystra, en annars eru vegir mikið til auðir.
Á Suðausturlandi er greiðfært frá Höfn og vestur að Lómagnúp, en hálka eða hálkublettir eftir það í Vík og yfir Reynisfjall.
Hálka, hálkublettir eða snjóþekja er á öllum leiðum á Suðurlandi.