Snjókoman á höfuðborgarsvæðinu það sem eftir lifir dags verður líkast til mun minni er veðurspár gerðu ráð fyrir í gær.
Þetta segir Teitur Arason, veðurfræðingur hjá Veðurstofu Íslands, og bætir við að ólíklegt sé að snjókoman muni hægja mikið á umferðinni.
Spáð er allhvössum vindi fram á kvöldið. „Það verður snjókoma og leiðindaveður frá því núna eftir kaffið fram á kvöldið en það ætti ekki að valda miklum vandræðum,“ segir hann.
Hann nefnir að allskonar veður sé á landinu og að mjög djúp lægð sé komin austur fyrir Langanes. „Í kjölfarið á henni er norðvestan stormur eða rok sem lemur á austurhelmingnum á landinu.“
Þessi mikli vindur mun standa fram á nótt. Norðanáttinni fylgir snjór sem er mestur á norðanverðu landinu, þar á meðal á Akureyri.
Að sögn Teits er spáð skaplegra veðri á sunnan- og vestanverðu landinu á morgun.