Þetta er adrenalínfíkn

Detta. Velta niður fjallshlíð. Rotast. Slást. Vera skotin/n með byssu. Bera sig að eins og þrautþjálfaður og þungvopnaður sérsveitarmaður.

Að leika þetta allt og margt fleira verður kennt á námskeiðinu Stunt 101, þar sem systkinin og áhættuleikararnir Jón Viðar og Ingibjörg Helga Arnþórsbörn kenna áhugasömum helstu atriðin í áhættuleik.

Námskeiðið verður 15. júní og skráning er á Facebook-síðu þess. Jón Viðar segir að meðal þess sem kennt verði séu fimm mismunandi viðbrögð við því að rotast; hálfrotast, steinrotast þar sem fólk stirðnar upp og fellur niður, að lyppast niður, detta fram fyrir sig eða rotast þannig að það slökknar á öllu. Það sama gildir um mismunandi viðbrögð við því að vera skotin/n.