Græni herinn svokallaði var endurvakinn í dag með táknrænni athöfn á sama stað og hann var upphaflega stofnaður fyrir 20 árum. Efnt var til gróðursetningar í Hveragerði sem mun marka upphaf starfsemi Græna hersins í nýrri 5 ára áætlun hans.
Fyrsta verkefni Græna hersins þegar hann var stofnaður fyrir tveimur áratugum síðan var að gróðursetja trjágöng í Hveragerði. Hann var svo endurvakinn í dag með því að gróðursetja trjágöng á öðrum stað í Hveragerði og með því að losa járn úr umhverfinu – svokallað risaplokk í samstarfi við Hringrás sem verður meðal verkefna hersins í nýju 5 ára áætlun hans.
„Herinn var bara stofnaður til eins árs [fyrir 20 árum] en ímynd hans hefur verið sterk og oft verið talað um að ræsa hann aftur og nú erum við að láta verða að því,“ segir Einar Bárðarson í samtali við mbl.is.
„Þegar við settumst niður í fyrsta skipti í vor ræddum við hvort og hvernig Græni herinn ætti erindi í dag og það var ákveðið að láta Græna herinn vera verkfæri í þrifum á náttúru og eflingu á betri umhverfishegðun,“ segir hann og bætir við:
„Ólíkt fyrir 20 árum þegar allt var sett á fullt í eitt sumar þá ætlum við að taka þetta í lengri skrefum og vera í 5 ár.“
Allir eru hvattir til að ganga til liðs við Græna herinn með því að setja „like“ við Facebook-síðu hans.