Vesturbæjarlaug lokuð í tæpar tvær vikur

„Vesturbæjarlaug er lokuð frá 24. júní til 5. júlí vegna viðhalds og framkvæmda. Við opnum aftur laugardaginn 6. júlí,“ segir símsvarinn þegar hringt er í Vesturbæjarlaug við Hofsvallagötuna í Reykjavík.

Vonbrigðin eru þó öllu bærilegri þeim sem hringir á undan sér en þeim sem mætir beint á svæðið, aðeins til þess að koma að lokuðum dyrunum. Þessi sjón blasir við hinum síðarnefnda:

Dyrnar kirfilega lokaðar. Iðnaðarmenn komast inn að aftan og þeir eru nokkrir á svæðinu um þessar mundir. mbl.is/Alexander

Eflaust hafa einhverjir lagt leið sína í laugina í morgun en gengið svo niðurlútir heim á leið eftir að ferðin reyndist fýluferð. Aðrir upplitsdjarfari kunna að hafa skundað vestar en í Vesturbæjarlaug, nefnilega út á Seltjarnarnes.

Vesturbæjarlaug er vinsæll samkomustaður íbúa í hverfinu og sumir koma jafnvel langt að. Hægra megin á myndinni er gamall barnapottur sem kulnaði í starfi og varð kaldur pottur, allt í takt við tímann. mbl.is/Alexander

Ekki fer sögum af því að verið sé að ráðast í stórtækar aðgerðir eða breytingar heldur virðist af myndum að dæma vera um að ræða venjubundið viðhald.

Hér má sjá menn að vinnu við að hreinsa laugarnar. Viðhalds mun hafa verið orðin þörf. mbl.is/Alexander

• Blogga um frétt