Jarðskjálftahrina í og við Öxarfjörð virðist í rénum. Þó hafa átta skjálftar mælst á svæðinu rétt tæpa 30 kílómetra vestnorðvestur af Kópaskeri frá því klukkan sex í morgun. Frá því á laugardag og fram á mánudagsmorgun mældust rúmlega 500 skjálftar á svæðinu.
Skjálftarnir sem hafa mælst í morgun eru ekki stórir en sá stærsti mældist 2,8 stig.
Þrír stærstu skjálftarnir í hrinunni eru 3,5 stig, 3,2 stig og 3,1 stig. Stærð flestra skjálftanna hingað til er á bilinu 1,0-2,0. Stærstu skjálftanna varð vart í næstu byggðum.
Jarðskjálftahrinan á upptök sín á Tjörnesbrotabeltinu en þar varð síðast öflug hrina í lok mars á þessu ári. Í þeirri hrinu mældust um 2.600 skjálftar á um það bil viku, þar sem stærsti skjálftinn var 4,2 að stærð. Skjálftarnir í þeirri hrinu voru nær Kópaskeri, eða í um 6 km fjarlægð.