Sjúkraþjálfarar lýstu því yfir strax í upphafi að þeir væru tilbúnir til að vera í rafrænum samskiptum við Sjúkratryggingar Íslands (SÍ) varðandi endurgreiðsluhluta skjólstæðings.
Þetta kemur fram í yfirlýsingu frá Félagi sjúkraþjálfara þar sem fullyrðingum Maríu Heimisdóttur, forstjóra SÍ, í kvöldfréttum RÚV í gær er mótmælt harðlega. Í fréttum RÚV í gær sagði María meðal annars að sjúkraþjálfarar beittu sjúklingum fyrir sig í deilunni.
Sjúkraþjálfarar tilkynntu í gær að þeir hefðu sagt sig frá samningi við SÍ og væru hættir að hafa milligöngu um niðurgreiðslu ríkisins á sjúkraþjálfun.
Fram kemur í yfirlýsingunni, sem Unnur Pétursdóttir, formaður Félags sjúkraþjálfara undirritar, að svo að rafræn samskipti sjúkraþjálfara og SÍ séu möguleg utan samnings þurfi SÍ að óska eftir því við ráðherra að setja reglugerð um slíkt. „En það hefur ekki verið gert. Það er því á ábyrgð SÍ og ráðherra að rafræn samskipti eru ekki möguleg,“ segir í yfirlýsingunni.
Samskipti sjúkraþjálfara og Sjúkratrygginga Íslands (SÍ) eru í uppnámi eftir að stofnunin tilkynnti á föstudag að sjúkraþjálfarar væru bundnir af ákvæðum rammasamnings næstu sex mánuði — þrátt fyrir að samningurinn hefði runnið út 31. janúar síðastliðinn. Sjúkraþjálfarar segjast ekki vera að hunsa gildandi samning við SÍ.
Í yfirlýsingu félagsins sem birt er á heimasíðu Félags sjúkraþjálfara í dag segir að Félag sjúkraþjálfara hafi ekki gefið út neina gjaldskrá til notkunar fyrir félagsmenn sína, líkt og Unnur ítrekaði í samtali við mbl.is í gær.
„Félag sjúkraþjálfara harmar að forstjóri SÍ fari niður á það plan að fara fram með rangfærslum og hótunum gagnvart heilbrigðisstétt, sem er í fullum rétti til að verja sitt starfsumhverfi með því að starfa ekki samkvæmt löngu útrunnum samningi við stofnunina,“ segir í yfirlýsingunni.