Veitur telja að leiðréttingin sem fyrirtækið gerði á vatnsgjöldum ársins 2016 nú í haust sé í fullu samræmi við lög. Þetta kemur fram í fréttatilkynningu sem Veitur senda frá sér. Þá sé ranglega talið í tilkynningu Neytendasamtakanna um málið að eignir OR séu að mestu til komnar vegna Vatnsveitu.
„Í tilefni bréfaskrifta samgöngu- og sveitarstjórnarráðuneytisins til allra sveitarfélaga í landinu nú í dag, taka Veitur undir það álit sem fram hefur komið af hálfu Samorku, samtaka orku- og veitufyrirtækja, að afstaða ráðuneytisins byggist á misskilningi,“ segir í tilkynningu Veitna.
Greint var frá því fyrr í dag að Neytendasamtökin segi að Orkuveitu Reykjavíkur (OR) mögulega hafa innheimt vatnsgjöld sem nema milljörðum króna undanfarin ár, umfram það sem lög leyfa, þar sem OR hefur greitt eigendum sínum arð.
Sú tilkynning var send í framhaldi af svari sem Neytendasamtökunum barst við fyrirspurn sem þau sendu samgöngu- og sveitarstjórnarráðuneytinu um heimild OR til að greiða út arð og hvernig fjármagnskostnaður skyldi reiknaður.
„Það er mat ráðuneytisins að sveitarfélögum er óheimilt að greiða sér arð úr rekstri vatnsveitna. (…) Það er mat ráðuneytisins að hugtakið „fjármagnskostnaður“ í skilningi 10. gr. laga [um vatnsveitur sveitarfélaga], verður ekki túlkað með þeim hætti að það geti náð yfir áætlaðan kostnað/arðsemiskröfu sveitarfélaga af bundnu eigin fé í vatnsveitum,“ segja Neytendasamtökin i tilkynningu sinni um svar ráðuneytisins.
Skora þau ennfremur á stjórn OR og kjörna fulltrúa eigenda „að skoða málið í kjölinn, krefja stjórnendur svara og tryggja að fyrirtækið endurgreiði notendum vatnsveitunnar oftekin vatnsgjöld undanfarinna ára.“
Forsvarsmenn Veitna segja hins vegar nokkuð um missagnir í tilkynningu Neytendasamtakanna um vatnsgjaldið. Þannig sé til að mynda látið í veðri vaka að arðgreiðslur OR til sveitarfélaganna sem það eiga séu að mestu vegna vatnsveitu. Þetta sé hins vegar rangt. „Hlutdeild vatnsveitu í veltu samstæðu OR árið 2018 var einungis 6,9%,“ segir í tilkynningu Veitna.