Ráðstefnuborgin Reykjavík (Meet in Reykjavík) finnur ekki fyrir samdrætti í ferðaþjónustu, að sögn framkvæmdastjóra félagsins, Sigurjónu Sverrisdóttur.
Ráðstefnum hefur fjölgað mjög síðustu ár og er útlit fyrir að þær verði enn fleiri á næsta ári, segir Sigurjóna í samtali við Morgunblaðið.
„Þetta er búið að vaxa mjög vel og fjöldi ráðstefna með fleiri gestum en 1.000 hefur tólffaldast í Hörpu síðan hún var opnuð. Það eru náttúrulega rosalega flottar tölur.“
Ráðstefnuborgin Reykjavík hefur það að markmiði að markaðssetja Reykjavík sem ráðstefnuborg.
Um ástæður fyrir aukningunni segir Sigurjóna:
„Þetta er árangur af átta ára vinnu hjá okkur. Þetta er rosalega ötult starf í að markaðssetja Ísland fyrir ráðstefnur og það er að skila sér.“
Einnig hefur tilkoma Hörpu haft mikil áhrif, en hún fær erlenda aðila í ráðstefnuhugleiðingum til að horfa til Íslands, að sögn Sigurjónu.
„Margir horfa til Hörpu til að byrja með en fikra sig svo á þann stað í Reykjavík sem hentar best.“